浮游磯釣之全層釣法 - 釣魚 Fishing

By Faithe
at 2009-06-27T02:52

Table of Contents

全游動釣法已經面世左7~8年,相信好多釣友都用過,
但係亦有好多朋友想知道佢嘅資訊,等小弟響呢度同大家分享一下!

一〉全游動釣法究竟係咩嚟？

      全游動釣法係浮游磯釣裡面一種全層嘅釣法，
目的係自釣組著水嘅果一刻開始，立即進入攻擊釣點嘅狀態，再配合誘餌嘅作
用，達至完美嘅‘誘釣同步'。

二〉全游動釣法所合適嘅釣場及魚種
      全游動釣法所合適嘅場地其實非常廣泛：外礁、港內礁位、人工石駁、直駁、碼頭、魚排都可以。不過都有盲點，六呎以下嘅淺場就唔係太適合！因為淺場所合適狙擊嘅層數太少，倒不如阿波釣法般直接！　　
      至於魚種方面，因為全層攻擊嘅關系，大部份魚種都有機會釣到：
      面層有幽面、煙仔虎、牛孟、烏頭、目黃等等。
      中層有磯釣人最愛嘅黑毛、白毛、雞魚、泥孟、黃立鯧等。
      至於底物方面有各類立魚、班、紅油、廉占等等。

三〉釣組配備
      釣組方面首先梗係要一粒"全游動浮子"啦，全游動浮子有好多唔同嘅外形，
而唔同嘅外形又對浮子嘅功能有比較細緻嘅分別！（功能上嘅分別遲Ｄ先同大家闡釋）。
      另外就係一粒"全游動專用水中"！呢一種水中響全游動釣組裡面嘅重要性只係僅次於浮子，千祺唔好忽視全游動水中嘅作用同威力！

四〉釣組設定
      由於全游動釣組係唔需要用線擋，所以同一般嘅阿波釣組有些微分別：由上至下～全游動浮子～水中～安全栓～擰圈卅直結～子線～微調咬鉛～鉤。

五〉釣組調整
１〉浮子
      每一粒浮子上面都有一個浮力值（Ｂ數），大至有幾種…２Ｂ、Ｂ、０、００、０００、００００等。Ｂ數愈大，浮力愈高；反之愈低。
   ２Ｂ用於流速高，釣組需要更多重量以助下沉時用。
   Ｂ用於正常流速。
   ０號浮子嘅浮力僅夠浮於水面，適用於流速稍慢及需要釣組較飄時。
   ００號～００００號係會於著水後慢慢下沉嘅浮子，用處係令母線沉降至水面以下，令整個釣組於水裡嘅角度延伸，從而增加釣組嘅傾斜角度。好處係可以令釣餌好似落葉一般自然‘滑’入釣點！但係響母線既操控上就需要更高嘅技巧！

２〉水中
      全游動專用水中五花八門，以Ｊ為重量單位，
      主要分為Ｊ１～Ｊ６（１＞６）。因應海裡面嘅環境因素而作出調整。
      例如流速高而需要釣組下沉加速就要用上較重嘅水中。
      無論如何都要由經驗去判斷！需要靈活運用，先可以得心應手！

３〉咬鉛
      因為下沉嘅工作主要係靠"水中"發揮，固咬鉛嘅作用只係用作調整子線切水嘅傾斜角，使之達至理想嘅 " 隱形４５度 "（子線同水成４５度夾角時，魚會因為角度問題而見唔到子線）。所以咬鉛唔會用太大，Ｇ１～Ｇ６比較常用。通常會於子線上平均分佈２～３粒。總之要視乎流水速度以及食餌情而作出個人化嘅調整。

六〉操控及張線技巧

操控）基本揮桿手法同阿波釣法無太大分別，
         當釣組著水後：閂杯，收回虛線，直至桿先感覺到釣組嘅重量，
桿先盡可能指向水面，然後開杯，用持桿果隻手嘅中指按住線杯，制止出線。
         水流會帶動釣組前進，中指有節奏咁鬆開、按緊，母線自然會被浮子牽引而送出。注意應盡量令母線崩直，整個釣組就會因"浮子"嘅承流力加上"水中"嘅潛降力而慢慢送到釣點!
         當然，誘餌粉嘅配合亦相當重要！釣手嘅目標就係要將釣組送到誘餌粉嘅範圍！呢種技巧一定要多練習先可以準確掌握！

張線技巧）張線技巧完全掌握於持桿手嘅中指上面，
      首先要明白中指放開，浮子嘅牽引力會帶動母線送出，令釣組順流推進;
      而中指按住線杯制止出線，釣組無法前進，"水中"自然往下潛。
      好好掌握一緊一放嘅節奏，釣組自然可以隨心所欲咁送到心目中嘅釣點！

七）魚訊判斷及抽桿時間
魚訊判斷 )       如果做好將母線崩緊嘅動作，而釣桿嘅傳感度又唔係太差嘅話，
魚訊一定可以從桿先傳到釣者嘅手中，就好似玩緊直感一樣！
      小弟經常用４號千又鉤中得二指老泥，就連食餌非常輕口嘅牛孟一樣無問題！
抽桿時機 )       其實簡單嚟講，全游動釣法嘅抽桿時間概括分為兩種：
一）魚訊由桿先傳到手中，中指感到「搶線」嘅感覺，跟住拉桿...唔使諗咁多，梗係立即抽桿啦！
二）母線突然之間瘋狂掹出去，釣者嘅本能反應好自然都會立即抽桿！

      當然凡事都會有例外

Tags: 釣點